ONCE Fundazioak Teknologia Irisgarriei buruzko Discapnet Sarien VIII. ediziorako deialdia egin du. Sari horien bidez, desgaitasunen bat duten pertsonen bizi-kalitatea hobetzera bideratutako teknologia onenak saritzen dira, baita irisgarritasun teknologikoaren arloan lan jarraitua egin duten enpresa edo erakundeak ere.
Horrela, sariak lau kategoriatan banatzen dira: lehenengoak, A kategoriak, dagoeneko merkatuan eskuragarri dagoen eta desgaitasuna duten pertsonen bizi-kalitatea hobetzeko teknologietan oinarritzen den produktu edo zerbitzu onena sarituko du.
B atalean, teknologiarako irisgarritasuna hobetzeko ibilbide jarraituagatik gehien nabarmendu den pertsona, enpresa edo erakundearentzat izango da saria.
C kategoriak teknologiaren bidez desgaitasunen bat duten pertsonen bizi-kalitatea hobetzeko inpaktu sozial handiena duen ekintzailetza-proiektua sarituko du. Azkenik, D atalak "teknologia irisgarriekin lotutako ekimenak, proiektuak, produktuak eta zerbitzuak gizartera zabaltzeagatik gehien nabarmendu den" komunikabidea sarituko du.
Aurreko edizioetan bezala, sariak ekonomikoak izango dira kategoria guztietan: A, B eta D ataletan saritutakoek 5.000 euro jasoko dituzte, eta C atalean saritutako lanak 15.000 euro. Azken kasu horretan, diru guztia saritutako proiektua garatzeko erabili beharko da.
Non eta nola aurkeztu lanak
Lanak aurkezteko epea 2025eko apirilaren 30era bitartekoa izango da, gaztelaniaz edo ingelesez, aurkeztutako kategoriari dagokion inprimakia betez. Inprimakia Discapnet Sarien 
helbidean dago eskuragarri.
Izena emateko inprimakia eta Discapnet Sarien VIII. edizioaren oinarri osoak hemen kontsulta daitezke: "Discapnet Sarien ".